:NAMN: "Gløym arven, du må bruke livet ditt på å leve best mogleg på eigne vegne."

Den tidlegare ordføraren i Bergen er blitt ei viktig stemme for eldre i Noreg, men du finn ho sjeldan i nærleiken av eldresenteret. Trude Drevland er stort sett omgitt av yngre folk og ein hit blant ungdom på sosiale media. 

Vi møter den fritalande dama i Oslo ein fredag rett etter at ho har vore hos TV 2 og summert opp nyheitene i veka som har gått. Dagen før har ho vore på møte i Kringkastingsrådet og no har ho ein liten time å avsjå før ho skal med fly til Bergen. Dagen etterpå legg ho ut ein video der ho blir hylla av eit av buekorpsa i Bergen, hamnar på byen og avsluttar laurdagskvelden på nattklubb. Søndagen stiller ho nysminka og velkledd klar for å bli fotografert i sentrum av Bergen, byen ho reknar som heime. Mange langt yngre menneske ville ha blitt slitne av eit slikt program, men for 76 åringen er dette akkurat passe. 

• Turbo-Trude 

Den tidlegare Høgrepolitikaren har mange jarn i elden for tida. Nyleg gav ho ut kokeboka Trudes tradisjonsmat, og etter det har ho vore i absolutt alle kanalar for å promotere denne. I tillegg er ho å sjå på tv-programmet Camp Culinaris, der ho kokkelerer saman med reality-deltakarar ho kunne ha vore bestemora til. Alltid nyfrisert, og med knall raude lepper. 

-Eg er skikkeleg jålete og brukar masse tid på utsjånaden. Slik er det berre, seier ho medan ei ung kvinne kjem bort og vil ha signerte kokebøker til heile slekta. Stadig er det kjente som helser, og mange vil også ha ein selfie med forfattaren. 

– Eg lever eit utruleg privilegert liv der folk er opptatt av kva eg har å melde. Dei fleste 50.000 følgjarane mine på Instagram er unge menneske, og eg skjønnar ikkje heilt kvifor eg er så populær blant dei unge. Men moro er det, og det er kontakten med dei unge som motiverer meg til å halde fram med å leggje ut ting på sosiale media, seier ho. 

– Har du alltid likt å stå i rampelyset og få så mykje merksemd? 

– Ja, slik har eg vore sidan eg var liten, og eg har heller aldri stått med lua i handa, for å seie det slik. Det er sikkert mange som synest det blir litt mykje Trude Drevland, men det er ikkje mitt problem. 

• Eldregeneralen 

Mykje av det Drevland deltek på handlar mest om moro og fest, men ho er ikkje framand for å snakke om alvorlege ting også. Det er ikkje sjeldan ho legg ut ein video på sosiale media, der ho ber dei ansvarlege innan eldreomsorga om å skjerpe seg. 

– Politikaren i meg er aldri langt unna. Seniorsaken har engasjert meg i lang tid og dette er noko eg verkeleg brenn for. 

Drevland er opptatt av dei eldre må planleggje alderdommen sin og ta inn over seg at dei faktisk er blitt gamle. 

– Svært mange er pensjonistar i 20–30 år, og då er det viktig å ha lagt ein plan for korleis ein skal leve gode liv desse åra. I tillegg blir vi 600.000 fleire eldre fram mot år 2060, og då blir det fort tomt for pengar hos Nav. 

Sjølv har ho kvitta seg med fast eigedom og leiger ein leilegheit i sentrum av Bergen. 

– Pensjonistar må slutte å tenkje på arvingane. Gløym arven, du må bruke livet ditt på å leve best mogleg på eigne vegne. 

• Redd for å bli dement 

Sjølv om 76-åringen lever eit travelt liv og er frisk på alle måtar, fryktar også ho alderdommen. Bror hennar, den kjente skodespelaren Lars Andreas Larsen, blei dement og levde med sjukdommen dei siste ti åra. Også mor deira fekk demens. 

– Eg er livredd for å bli dement eg og testar meg dagleg ved å telje baklengs frå 107. Samtidig prøver eg å leve livet til fulle kvar einaste dag. 

Og livet blir absolutt levd. Det kan alle som følgjer henne på sosiale media, skrive under på. Med raude lepper og ditto negler kastar ho glans enten det er på ein 40-årsdag eller kroninga av den engelske kongen. 

– Eg har gitt streng beskjed til dottera mi at ho må sørgje for at det ytre er på plass om eg skulle ende opp som dement på sjukeheimen. Leppestiften skal på uansett korleis den mentale tilstanden er. Stygg på håret skal eg heller aldri bli! 

 
(©NPK)